20 маусым күні Астана күні мерекесіне орай Ұлттық академиялық кітапханада қала тарихын арқау еткен маңызды іс-шара өтті. Тарих ғылымдарының докторы, профессор Жамбыл Артықбаевтың «Қараөткел құпиялары» атты тарихи-танымдық кітабының тұсаукесері өтті.
Аталған еңбек Астана қаласы Мемлекеттік архивінің ғылым-әдістемелік кеңесінің ұсынысымен жарық көрді. Астана қаласы мемлекеттік архиві мен тарихшы Жамбыл Артықбаевтың бірлескен ізденісінің нәтижесінде Архив құжаттары мен тарихшының ғылыми зерделеуі тоғысып бұл еңбек – елорданың мәдени-тарихи тамырын тереңнен танытатын құнды дереккөзіне айналды.
Іс-шара аясында архив қорынан құралған «Шаһар шежіресі» фотоқұжаттар көрмесі жұрт назарына ұсынылды. Бұл көрме – елорданың қалыптасу тарихын баяндайтын көне фотосуреттер мен құжаттар арқылы өткен мен бүгінді жалғаған алтын көпір іспетті.
«Қараөткел құпиялары» – Есіл мен Нұраның арасын мекендеген ежелгі Қараөткел өңірінің көмескі тарихын қайта сөйлеткен, Астана атауының артында жатқан терең мағыналарға үңілткен ерекше еңбек.Бұл еңбек – тарихқа қызығушы оқырманға, жастарға әсіресе оқушылар мен студенттерге арналған. Отаншылдық пен танымдық тәрбиені ұштастыра отырып, жас ұрпақтың тарихи жадысын жаңғыртуды мақсат еткен еңбек.
