Публикации

«Наурызнама» тұжырымдамасына орай өткен Наурыз
Қазақ елі биыл Наурыз мейрамын он күн бойы тойлады. «Наурызнама» тұжырымдамасына сәйкес Көрісу күнінен басталған мереке 14-23 наурыз аралығында Тазалық күнімен түйінделді. Ұлыстың ұлы күні қарсаңында Табиғат-ана да мейірім танытып, Ұлы даланың түкпір-түкпірінде күн шуағын шашып, жер бауыры жылып, қар көбесі сөгілді. Осы айдың орта тұсынан басталған жаймашуақ күннің өзі мейрамның ерекше екенін паш етіп тұрғандай.
Жаңа тұжырымдамаға сәйкес 14 нау¬рыз Көрісу күні – Амал мерекесі ретінде белгіленді.
Астана қаласының Мемлекеттік архиві алғашқы көрісу күнінен бастап, Наурыз мерекесін мән-мағынасымен тойлауға атсалысты. Алғашқы күні-ақ қызметкерлер бір-бірімен көрісіп, жаңа күннің сәтін тіледі.
Сондай-ақ, 17 наурыз – Шаңырақ күні. Қазақ мәдениетінде шаңырақтың орны ерекше. Шаңырақ - көк аспан, шаңырақ - үй-жай, шаңырақ- отбасы, тірек, шаңырақ - бақуаттылық пен қауіпсіздік және ұрпақтар сабақтастығы. Ол - ұрпақтан ұрпаққа жалғасып келе жатқан материалдық және рухани мұра. Бұл күні отбасылық құндылықтар насихатталды.
18 наурыз – ұлттық киім күні болғандықтан, ою-өрнекті, сәнді ұлттық киім киген архив қызметкерлері әлеуметтік желіде құттықтады.
19 наурыз – Жаңару күні. Наурызнама онкүндігінің алтыншы күні «өмірдің жаңаруын» бейнелейді. Бүгін Астана қаласының мемлекеттік архивінің аумағында «Жаңару күніне» орай тазалық жұмыстары жасалды. Сонымен қатар бұл күні архив қызметкерлері «Asia Park» сауда-ойын орталығында Наурыз мейрамын мерекелеуге қатысты «Наурыз – архив деректерінде» архивтік құжаттарынан құрылған көрмені ұсынды.
20 наурыз «Ұлттық спорт» күні болып белгіленген.Ұлттық спорт түрлері мәдени мұраны сақтауға,жас ұрпақтың ұлттық сана-сезімін күшейтуге ықпал етеді. Осы күні Ұлттық спорт күніне орай архив қызметкерлері арасында жарыстар ұйымдастырылап,ұлттық ойындар ойнатылды.
Наурыз мейрамы туған жер топырағына құт – береке әкелсін. Баршаңызға амандық, саулық, дастархандарыңызға молшылық тілейміз!